八方幾日前都講過，政務司司長林鄭月娥若然辭職，盛傳中央今次會極速批核，以示支持。極速即係快成點？八方聽聞係3、4日，至少唔會短過上屆唐唐辭職到獲批嘅兩日，因為若然批得快過唐唐，欽點味又太濃喎。
揣摩阿爺意
至於等辭職等到頸都長嘅鬍鬚曾，據聞佢必定會衝閘參選特首，事實上佢亦都冇乜退路。但係有個問題要面對，就係林鄭獲得中央支持嘅消息傳遍整個政圈，令到曾營軍心動搖，有傳唔少人已經改為支持林鄭做特首喇。
有建制選委不諱言，當時挺曾，唔知道有林鄭呢個選擇，以為只得CY鬥鬍鬚曾，咁梗係ABC啦。類似論調，曾營近期係咪聽唔少？而其實政圈嘅「俊傑」，向來都幾多！
眼見唔少人西瓜靠大邊，有薯片粉絲都擔心，鬍鬚曾要攞150個提名都有難度，因為提名係公開，唔少人或者怕真係逆咗阿爺意思，從此境況堪虞喎！