主持會議時較中立，熟悉議事規則嘅立法會前主席曾鈺成，最近原來由議事堂跳入課堂，今日（12日）起喺中大重拾教鞭，教議事常規同議會運作。
教議事常規
八方聽聞呢個係中大政治與行政學系嘅課程，共14堂，特別之處係除咗曾主席，連2012年退休嘅立法會前秘書長吳文華都係老師，打孖一齊教。吳文華退休後出過解釋議事程序原意同先例嘅「天書」，拍住曾主席授課，難怪有過百學生報讀。
曾主席重操故業做老師，係因為中大政治與行政學系高級講師蔡子強約一年前提出邀請，估唔到曾主席都有興趣，仲建議同吳文華一齊教，其後中大校長沈祖堯仲同曾主席食飯，席間頒發委任狀。八方問過蔡子強，佢話唔少學生近年問點解唔開番議會常規呢科？所以邀請曾鈺成出山。呢科對上一次開課已係約廿年前，由立法局前主席黃宏發授課。八方聽聞曾主席嘅教職銜唔係普通嘅客席教授，而係社會科學院榮譽教授，唔知俾曾主席叫過收聲嘅蔣麗芸，去唔去聽書？