立法會長期開住冷氣，喺入面做嘢少不免着到密密實實。但噚日一班尊貴嘅立法會議員竟然除晒外套、摺起衫袖，有人直情除剩底衫，乜西九故宮館風波燒到立法會，搞到大家㷫烚烚？查實只不過因為要打流感疫苗啫！
食物及衞生局眼見流感高峯期就快殺到，趁住噚日立法會大會開始前，安排一眾議員打針，食衞局副局長陳肇始仲親臨監場。唔少議員不分左中右都支持，但就唔係個個都有備而嚟，事關打流感疫苗，支針係要打喺左手上臂，但唔少議員着長袖貼身衫，淨係摺起衫袖都搞一輪。
為免麻煩，至少兩位男議員索性喺鏡頭前一脫，何君堯除咗件恤衫，就露出白雪雪嘅短袖鬆身內衣，畀護士打針，神情好從容；原本着住墨綠色唐裝嘅新民黨田北辰亦有脫，由於佢嘅雪白內衣比較緊身，惹來在場人士譁然，人力陳志全仲肉緊大叫：「嘩，你除衫呀！」
梁君彥唔做榜樣
之不過睇完人哋脫嘅慢必，卻守身如玉，打針時就只係摺起衫袖，冇除衫露肉，而佢打針個樣都幾痛苦，但都唔及工聯會麥美娟，佢打針前已經講到明，連捐血都會暈，所以好怕打針，結果喺打針嗰一刻高聲大叫，個樣好苦，要陳肇始在旁安慰。麥美娟自爆，之前試過捐血後驚到暈低，「直情係暈到不省人事」，經過兩次暈倒經驗後，已經被禁止再捐血，仲話連做針炙都會叫到呱呱嘈。
至於立法會主席梁君彥呢，竟然冇打針做榜樣，原來佢話高永文局長遲遲未回覆安排，所以自己一早打咗咯。陳肇始就希望今次活動可以推廣注射疫苗重要性。
李八方
mailto:pf_lee@appledaily.com