新鴻基地產近年舉辦唔少活動，都將運動同慈善結合，好似去年分別舉行「新地公益垂直跑－勇闖香港ICC」及贊助單車節，兩個活動籌得860萬，至少11個機構受惠。
同爸爸睇北極光
新地噚日舉行慈善捐款頒贈儀式，介紹番各受惠機構同項目，新地執行董事郭基煇（Adam，圖）都有出席，大家當然追問早前一眾富二三代同政務司司長林鄭月娥嘅飯局啦，身為座上客嘅佢笑言呢個聚會已經舉辦咗好幾年，由林鄭做發展局時已約半年食一次，當中都唔係個個係地產商，唔同界別嘅人都有喎！
講到跑馬仔，商界係咪鍾意財爺理財主張多過林鄭呢？Adam就唔評論個別人，但覺得大家唔好以為凡福利政策商界都反對，因為社會若果唔和諧，好多時矛頭會指向商界喎。
講番佢自己，原來剛過去嘅聖誕同新年，與爸爸郭炳江成家人去咗芬蘭睇北極光，佢話好開心，3年來第一次成家人去玩，前兩年過時過節都想去探爸爸，但對方叫佢唔使掛住佢、多啲去玩，咁佢當然聽話去玩啦，仲將啲相寄畀爸爸㖭！