成班Marvel擁躉等到頸都長，香港迪士尼樂園嘅「鐵甲奇俠飛行之旅」今日終於正式開幕啦。呢個設施總共出動超過70個本地幻想工程師，前前後後籌備成3年咁多，仲要係全世界得香港至有，難怪連華特迪士尼樂園及度假區主席包正博都要親自飛嚟香港試玩。
喺呢個新設施入面，遊客戴上立體眼鏡，登上可以容納45個人嘅「鐵甲號」機艙，就可以通過4D劇院體驗，由迪士尼樂園「飛」到香港史達大樓，同Iron Man穿梭香港鬧市，迎戰Hydra機械人。樂園早排試玩嗰陣，以問卷向超過200位參與優先體驗嘅遊客做調查，足足有98%嘅人都話享受呢個新體驗，97%表示合乎甚至超越期望，大讚有真實感同相當刺激咁話。