華懋賣樓部主管吳崇武，入行賣樓超過40年，近年說話越來越灑脫，大方自爆舊年賣樓抄行家橋之餘，噚日仲講明，嚟緊準備繼續抄長實（1113）「樓神」趙國雄條「天下第一好橋」㖭。
話說前日長實「樓神」趙國雄自誇已經度咗條「天下第一好橋」去吸引人買荃灣樓，華懋喺同區都快有樓賣，吳崇武噚日就話，「佢有天下第一好橋，到時我一於抄橋」。
佢仲期望，長實賣個滿堂紅，「佢哋行得通嘅，我相信我哋都行得通」，「藉住佢個餘威，我哋都做到個勢出嚟」。佢加多句話，舊年賣將軍澳樓，都係抄人橋，好讓代理唔使記咁多料喎。所以話呢，商業世界，唔係你死就我亡嘅。