公民黨一眾小鮮肉，包括油尖旺區區議員余德寶同東區區議員鄭達鴻，前晚就換晒波衫波褲同波鞋，落場同民協新生代，包括民協副主席楊彧等作戰，但今次唔係選舉場上對壘，而係喺足球場上對決，喺新一年之初嚟場友誼賽，當做運動之餘，又可以加強黨派之間嘅交流。
八方問過余德寶，點解咁有興趣踢場友誼波？佢話冇乜特別原因，旨在同其他黨派輕鬆交流吓；今次係第一次搞呢啲以波會友聯誼活動，嚟緊應該會再搞。佢笑笑口話民協嗰邊一直有練習開，佢哋公民黨呢隊就係首度合作。據知場波其實互有攻守嘅，但公民黨都輸咗兩、三球喎。余德寶話，輸贏都冇計啦，和氣生財。