正所謂人不風流枉少年，做得英超球員人工高又時間多，追吓女仔原本都無傷大雅，不過如果本身已經有家室，又出名到有wiki專頁，上網識女仔就要小心啲嘞。好似米杜士堡嘅烏拉圭中場加斯頓拉美利斯，就真係樣衰到盡，話說佢透過Instagram識女仔，仲以為用番個人認證賬號威啲，增加成功率，就走去撩一個索女，仲好直接咁問人係唔係單身。點知呢位女仔鬼咁精，上一上wiki就搵到加斯頓拉美利斯嘅事迹，除咗知道佢係烏拉圭國腳，效力米杜士堡等等基本資料外，仲列埋佢年初先同Micaela結婚㖭，結果位索女立即回應佢：「我係單身，不過你唔係喎」，之後列埋一大段wiki文，詳列拉美利斯家庭狀況㖭。
老婆啱啱生完仔
Micaela周四先幫拉美利斯生個囝囝，拉美利斯竟然趁老婆產子期間意圖偷食，驚起上嚟即時刪晒個人Twitter、Instagram等賬戶，以為咁就冇事，可惜個索女cap晒圖，仲俾各大傳媒知道㖭。拉美利斯都真係要買定鑽石，好好向Micaela跪地認錯嘞。嗱，拉美利斯呢次偷食事敗，就真係爭啲經驗，應該學吓早幾日拿斯尼咁，爆出疑似點滴打上床事件後，就話係黑客入侵，連香港特首都用過呢個藉口，拉美利斯照抄又何妨。