慕容控股（1575）趕住年尾開始招股，個名咁有氣勢，唔知以為佢真係《天龍八部》姑蘇慕容家嘅真人版，業務好明顯唔係想光復大燕，點知連老闆都唔係姓慕容，有心趁熱鬧嘅人真係表錯情了。
慕容控股老闆姓鄒，事緣佢幫「慕容中國」打工，之後買起自己東家，做埋老闆，依然保留舊公司名字，發展到上市，真係恭喜晒。
慕容控股做乜生意？齋睇名真係好難估，原來係生產梳化、梳化套，主要出口美國。
通常做廠嘅公司都好平實，但呢間竟然有個「資本市場部」，主管徐景年僅30歲，之前做過德勤、建銀國際。鄒老闆話，資本市場部係專為上市而設，主要協助CFO睇住盤數，負責投資者關係、集資及資本市場活動。