今日應該係AC米蘭近五年嚟最快樂嘅聖誕。上周五喺多哈上演嘅意超盃AC鬥祖雲達斯，雖然係祖記門將保方第600次為球隊披甲嘅大日子，但風頭就俾佢接班人基安盧基當拿隆馬蓋過晒。
兩隊踢到加時仲係1:1，當拿隆馬喺互射12碼作出關鍵撲救，幫AC自2011年之後再次贏得錦標。
當拿隆馬極刑戰show time
祖記喺開賽18分鐘就由中堅基亞連尼先開紀錄，不過到完半場前七分鐘，AC中場邦拿雲度拉接應蘇索傳中，受夾擊下頭槌頂入扳平1:1。兩隊之後喺法定時間到加時上下半場都再冇紀錄，要以互射12碼分勝負，首輪極刑戰AC有「新恩沙基」拿柏度拿射門被保方撲出，但祖記前鋒文迪蘇傑隨即宴客中楣唔入。到第五輪就係當拿隆馬嘅表演時間，佢飛身單手撲出保羅戴巴拿嘅射門，之後AC由柏沙歷搞掂射入，以4:3擊敗祖記。
近年祖記喺意甲打橫行，2012年起到上季已經連贏五屆聯賽冠軍，而2011年聯賽冠軍AC，自同年喺鳥巢贏國際米蘭拎意超盃後，到今年先再贏得錦標。
17歲嘅當拿隆馬贏得職業生涯首個錦標，賽後話要將佢獻畀球會主席貝盧斯科尼：「或者呢個係佢喺AC最後一項錦標，無論如何我都希望送畀佢。呢場最開心係可以同祖雲達斯踢成均勢。」
保方600場留憾
今場係比當拿隆馬大21年嘅保方第600次代表祖記上陣，佢賽後都話有啲遺憾：「2016年唔可以寫個完美句號，感覺真係麻麻地。」下個月就39歲嘅保方，預計佢喺球壇都係踢多一年多啲，見到意大利有個信得過嘅門將接班人，都應該安慰嘅。