聖誕前夕，多支英超球隊出動送暖，關懷社區，例如利物浦就去醫院探病童派禮物，愛華頓就打電話同球迷講聖誕快樂，車路士就請啲青年軍去見球星。除咗做好人好事，英超各隊仲積極備戰快車期，但喺記者會上，英媒最關心嘅議題係車路士領隊干地提出嘅「中超威脅論」。阿仙奴領隊雲格都認同：「中超球隊投資好大，形成好大嘅吸引力，你問我未來會唔會影響到英超？我覺得會。」利物浦主帥高路普似乎唔多稀罕人民幣，「我真係唔明去中超啲人諗乜，我唔會諗。中超唔係一個你想去嘅聯賽，唯一動力只係錢。」不過中超球會一於少理繼續挖人，據報恒大開70萬鎊（約668萬港元）周薪同國安爭曼聯隊長朗尼。