聖誕交換禮物隨時變「交換廢物」，因部份人「趁機」送出家中無用「廢物」。《蘋果》訪問市民後選出「三大廢物」，包括過時的年宵聖誕等節慶裝飾、用過舊物如教科書，但最多是交換禮物圈內無限輪迴的毛公仔、相架及杯，大家互相轉手推讓。其實不合意的禮物可捐予慈善機構，只需保持整齊及乾淨，就容易覓得新主人。
記者 伍雅謙
愈來愈多人要應節又環保，會互相交換不合用的物件作聖誕禮物。不過，相架及杯分分鐘在交換圈內無限流轉，亦未能覓得接收者。曾與朋友在聖誕節交換「廢物」的陳小姐就指，「自己會送出相架同杯呢一類，其實都係人哋送畀我嘅」；黃先生本身也不希望收到相架，「依家都用晒數碼相機，應該唔會用相架，不過我自己都送過出去」，他指亦會考慮送出其他不要的物品，「out咗嘅figure（模型）囉，例如自己冇咁鐘意嘅，再生俠嗰類啦」。
謝小姐則打算送出已堆滿一床的毛公仔，「收到好多次公仔，有啲好大隻...全部放係床邊，堆到山咁樣」，笑言毛公仔堆內有齊動物、卡通人物、迪士尼公仔等，可揀出較新淨的送出。至於堆滿林先生家中的，則是年宵產品，「（年宵）經過支持吓香港經濟，咁就會買吓」，其家中已有10多件紅噹噹及不同生宵的年宵品，「枕頭嗰啲囉，放晒係梳化同床到」，坦言希望送出「清倉」。鄭先生則指最想送走教科書，「以前中學剩低啲書，中四、中五都有，畢咗業好多年，擺喺度冇理過」。
救世軍發言人指，每年聖誕過後，均會收到大批捐贈品，包括有衣物、文具、杯、玩具、毛公仔及聖誕裝飾等，其中以二手衣物較易為人接受，玩具則大多需要檢查清楚才考慮接收，毛公仔也並非熱門產品，「除非自己儲緊，如果唔係唔容易搵到新主人」。
不受收禮者歡迎的相架及杯，原來在救世軍家品店也有市場，「相架都有啲人鐘意嘅」，以連包裝的簇新產品較佳，「完全唔拆（包裝）捐過嚟都歡迎」，發言人指部份人會特地到救世軍選購聖誕禮物，故連包裝紙的產品更易出售。
節慶日子或許想要全新禮物及服飾，要不花分毫其實亦有選擇。換物平台「執嘢」（JUPYEAH）周日（12月18日）在觀塘舉行「Pre-Christmas Pop Up Swap」活動，發起人之一胡文珊表示，今次以交換全新物品為主，只因不少人屋企「可能有收收埋埋，但冇用過嘅禮物同應節衫」，歡迎攜同到場與他人分享，即場交換，做到零消費也能應節。
【市民最想送出的三大「屋企廢物」】
‧節慶物品
代表：年宵產品、聖誕裝飾
‧已過時的物品
代表：中學教科書、手辦模型
‧曾收到的無用禮物
代表：杯、文具、相架、毛公仔
【Pre-Christmas Pop Up Swap活動詳情】
收費：60元
日期及時間：12月18日中午12時至下午6時
地點：楊五八（觀塘大業街34號楊耀松第五工廈8樓）