新民黨主席葉劉淑儀宣佈參選特首，將參選立法會嘅口號「我哋一齊贏返香港」縮短為「贏返香港」當競選口號，而海報設計（圖）仲好有「心思」，將「贏」字上半部同英文「win」結合，驟眼睇以為「亡返香港」，大吉利是之餘，仲變關公災難。
因為葉劉呢個咁獨特嘅設計，令一眾好學嘅網民即刻查字典睇吓「吂」字到底點解，睇番最早出現呢個字應該係漢代《方言》，解作「不知也」，到宋代《廣韻》有記載為「老人不知」等，有網民問呢個係咪反映葉劉治港理念？定反映佢選情？又有人將海報個win字改為Rip（可視為葉劉英文名嘅簡寫），當然，更多人會睇到另一個意思啦。
難得葉劉令咁多網民鑽研中文，人稱Ben Sir嘅中大中文系高級講師歐陽偉豪都要湊吓熱鬧，喺fb上載「ben sir學堂」：「贏字，核心喺個貝度，貝即係銀。冇貝，即係冇銀用，咁你贏乜銀呢？」