恒隆地產董事長，難得噚日「上水」，出席恒隆數學獎頒獎禮。身為頭號「梁粉」，點知一句都冇提過特首梁振英，成程由保鑣護航，好似借咗「聾耳陳」隻耳咁，無回應記者提問，連寸嘴都冇，令人大失所望。唔知係咪因為689唔選，陳啟宗心情唔好，無謂出聲，定係學另一位大富豪、新世界主席鄭家純咁極速變臉，唔認「舊相好」，總之十問九唔應。
眾所周知，陳啟宗好重視集團本年報，次次都親撰萬言文，講吓自己點睇市道。9月份嗰陣，佢喺恒隆集團嘅中期報告入面，突然表態支持梁振英連任，又大讚個樓市政策做得好，陳啟宗勇者無懼，力排一眾「梁粉」而出，仲要白紙黑字咁寫出嚟挺梁，都真係夠晒義氣。唔知梁振英決定唔連任前，有冇單聲陳啟宗知，如果冇，呢鋪都真係唔夠朋友。