澳門新晉馬主、香港歌手吳國敬剛周五晚在氹仔馬場，憑「地產雄星」及「盈美無限」起孖，其中「盈美無限」季內三戰全勝，成為澳門今季首匹三捷馬，令阿敬威上加威，兩位本港練馬師蘇偉賢及葉楚航，亦有到場拉頭馬。
估唔到幾個鐘頭後，蘇偉賢、葉楚航立即在沙田馬場現身，落力督操，睇嚟兩人幾乎冇休息過咁滯，其中蘇偉賢更捉住蘇兆輝及潘頓傾個不停，充份反映他心中有馬，惦掛住周日(4日)賽事，希望保持練馬師榜首地位。
今期蘇偉賢有第七場四班1400米「一追再追」交由潘頓操刀，此駒在港兩戰俱跑得近，可見質素甚佳，熱身足夠後再戰1400米，可望穩入三甲。至於蘇兆輝則為蘇偉賢策騎第九場三班1400米之「喜得福」，此駒今次跑番唯一贏馬路程，賽前試閘亦有好走勢勝出，加埋蘇偉賢由澳門漏夜趕返香港同騎師密斟呢個動態，更可相信上述兩駒應是馬房重心出擊分子。