藍牙耳機呢排幾紅！自iPhone 7發貨，正式公佈飛走3.5mm耳筒插後，好多不同廠商都開始着力研發藍牙耳筒產品，最近這批新貨，終於開始陸續浮現。
呢款係香港品牌XPOWER推出的BE2藍牙4.1耳機（$598），佢同AirPods一樣，使用盒仔裝機及叉電設計，不過老實講，論設計當然係冇咁型啦！機身使用立體聲CSR晶片，音效表現感覺算是不俗，不過在低音表現方面有點點散，始終不是專業音響品牌。
使用時間為聽歌2個小時，講電話4個小時，如果加埋內置的2,000mAh電池盒，據稱使用時間可增強至20倍！如果嫌電量太過充足，你仲可以用跟機送的雙向專用叉電線，將佢變成外置電源，為手機叉電。
此機另一大賣點，就係兩粒藍牙耳機，都使用獨立的藍牙模組設計，所以可分別配上兩件完全不同的智能裝置，例如左邊耳筒駁電腦聽歌，再用右邊耳筒駁手機聽電話都冇問題。
開價比較偏向中間路線，一般國產藍牙耳機，最平都要近$200-$300，不過冇牌子、冇保養；至於較大的音響牌子出品，大多又要逾千元；如此走中間路線產品，又要冇電池盒設計，現在腦場內選擇唔多。
查詢：A-Grade（深水埗黃金電腦商場地庫43B）
記者、攝影：朱崇德