鄭少秋、張智霖、呂良偉與太太楊小娟、商天娥等昨晚現身鴨脷洲，出席長者盆菜宴活動，梁醒波女兒、曾參演《香港八一》等系列的「順嫂」、資深甘草演員梁葆貞也有出席。順嫂透露已移民加拿大多年：「退休多年，成日都喺加拿大、香港兩邊走，兩邊多朋友，之前仔同新抱都喺香港，有兩個孫仔喺香港，𠵱家全部都喺加拿大，總共有4個孫仔，最大嗰個讀緊碩士，最細嗰個都讀緊大學。」
鄺美雲遇阿呂
問到順嫂會否有人斟她拍劇，她說：「我70歲退咗休，就快79歲，自己都冇留意，做慣乞兒懶做官，有得舒服，唞吓唔做，都冇戲癮，以前拍戲都係搵食養兒女，𠵱家真退休，返香港搵朋友飲吓茶出吓街，平時喺加拿大打吓牌。」
此外，阿呂表示會與太太上台表演：「𠵱家有時間做吓善事，我都有教囝囝有能力幫吓人，佢好生性大個仔，都鍾意表演畀長者睇。」阿呂的前妻鄺美雲亦有前來，大方與阿呂夫婦合照，她表示：「我哋成日都有見，好朋友，仲有同小娟分享扮靚心得。」而秋官透露忙為明年5月舉行入行50周年的演唱會準備，他說：「阿姐問咗佢，不過佢8月又開，睇佢會唔會幫我，阿女都想叫，佢得最好，喺台上表演一字馬。」
採訪：曹家誠
攝影：陳俊強