青年新政梁頌恆、游蕙禎被法庭判取消議員資格，立法會秘書處要求佢哋噚日下午5點前清理立會大樓10樓辦公室內物品，交番辦公室畀秘書處，而青政噚日搵咗職員同工人去搬走辦公室物品，不過唔知係咪因為上次有記者入青政議辦影相，秘書處今次嚴陣以待，唔畀記者跟埋入去採訪。
馮敬恩幫手搬
青政噚日下午搵咗馮敬恩同一名青政職員，帶埋一班搬運工人去10樓議辦搬嘢走。據知梁頌恆同游蕙禎都冇現身，而房外有保安把守，唔畀記者停留影相，而青政職員出嚟時，一直有立法會保安跟住，明顯唔畀佢哋喺大樓入面周圍走。
八方見到佢哋搬走好多大件辦公室器材，好多好新淨，但佢哋可唔可以保留仍係疑問，因為立會行政管理委員會下星期四開特別會議，傾點收番梁、游預支嘅酬金同營運資金，呢啲器材隨時要畀番立會。