本周三（2日）晚小鮮肉騎師史卓豐好似坐過山車，先贏苗禮德旗下「金太陽」情緒高漲，冇耐策廐侶「皇牌」墮馬險過剃頭，竟然奇蹟全無受傷。
史卓豐勝在22歲精力充沛，今早（3日）坐飛機去澳洲，準備周六策「地位高」出戰阿聯酋錦標一級賽之前，竟唔爭取時間休息，反而有異動抽空到馬場，為周日（6日）沙田其中五匹座騎「志友運」、「世界紀錄」、「紅星」、「人間尋夢」及「旌暉」出跳，作最後備戰，擺到明當中會有真命天子。
其中最特別係第三場四班1400米的「世界紀錄」，今朝豐豐操完，練馬師苗禮德連杯咖啡都未放低，就攞埋杯咖啡，趕去機坪接馬，聽取豐豐操練匯報外，仲一齊喺度睇馬，兩人睇咗好耐都唔散水，可以話盡露搏殺手影。「世界紀錄」上仗氣管有血亦後上第三，拼後受操健康回穩，相信已站在勝利邊緣。