噚日八方講到，5年前嘅《成報》踢爆備選緊梁振英，同明天更好基金行政總裁鄧淑德係「關係密切的紅顏知己」。而5年前嘅今日係特區授勳儀式，梁振英仲喺時任特首曾蔭權手上領咗個大紫荊勳章，心情一定好好啦，難怪叫埋個老婆出嚟幫手解畫。
攞到大紫荊喎，梁振英差在未開心到跳起，當年今日嘅佢喺禮賓府滿場飛，周圍同人合照之外仲答記者問題，因為記者問佢同鄧淑德單嘢嘛﹗梁振英就話單嘢係冇事實根據、係揑造，同時亦否認打老婆傳聞。跟住梁唐青儀仲笑住幫梁振英講說話，梁太指件事「好荒謬、好笑笑」，事關佢同鄧淑德都識咗好耐。
係呀，真係好荒謬呀，因為後來打梁唐青儀嘅唔係梁振英，係梁齊昕嘛﹗好快又萬聖節，亦係齊昕以女鬼裝當眾掌摑梁太事件一周年。