立法會噚日開內會，保安明顯加強，怕且又驚有人衝擊，除咗保安人數明顯增加，連議員有乜異動都睇到實！好似噚日白鴿黨新丁議員許智峯喺立法會開內會前，推住架摺起咗嘅單車步入會議廳門口，即時令保安大為緊張，撲出嚟睇許智峯搞乜，而阿峯只係將架單車泊喺會議廳門口，就趕入去開會。
阿峯會後同八方講，其實因為噚日趕時間，為免錯失投票機會，所以冇好似平時咁，將架單車泊上9樓民主黨議辦，而係直接推去會議室趕開會，估唔到保安咁緊張。阿峯仲話，過去已經常踩單車由中環議辦往返立法會，話現時天氣唔熱，所以踩單車都唔覺辛苦，仲夠晒環保。