從未試過咁爽！講嘅係九龍公園舉行嘅港九學界D1泳賽，第一年實施持票入場，每間學校限100人，令場內暢通無阻；不過，噚日連破兩個A組紀錄嘅女拔中六生兼隊長黃筠陶就唔贊助限制人數，覺得氣氛受影響喎。總成績方面，長勝軍男、女拔萃就喺初賽獨佔鰲頭16歲嘅陶陶話：「我唔贊成限人入場，聽到『學界』呢兩個字都畀到人熱鬧、好嘈嘅感覺，但限人入場後，少咗啲幫我哋打氣嘅人，影響咗氣氛。」陶陶仲話以女拔為例，之前D1泳賽有成200幾人到場打氣，𠵱家限制咗，令好多家長同舊生入唔到場，啦啦隊都減半。
雖然唔贊成人流限制，但今年係最後一年參加D1泳賽嘅陶陶都冇受影響，喺主項50米同100米背泳都刷新A組紀錄（見附表）。佢話：「時間都滿意，但仲未係我個人最佳時間，決賽希望再游好啲。」對於女拔可唔可以爭取29連霸，佢就話好有信心。
劉彥恩教路接力入場
依噚日所見，18間參賽學校，每間100張飛，1,800人幾乎坐滿游泳館。大會安排咗人手喺門口收飛，平時一入到泳池，多少會有啲公公婆婆喺公用坐位唞涼，但噚日冇咗呢班人；入口嗰層雖然仲有學生打地舖休息，但已經唔似以前咁逼到爆，總算有番條通道行吓啦。樓上啦啦隊嗰層都一樣，以前寸步難行，𠵱家暢通無阻，雖然啦啦隊人係少咗，但個個好一樣咁落力打氣，氣氛都唔錯。協恩中學教練林威強都贊成人流管制：「以前我都覺得人太多，企同坐都唔夠位，場內人多到透唔到氣，我覺得今年整體幾好，氣氛一樣熱鬧。」
香港里奧游泳代表兼女拔舊生劉彥恩同江忞懿，噚日都闊別D1五年幾後重返呢個戰場；佢哋睇到現場有大螢幕，又有電視直播，鬼咁羨慕一班學妹。劉彥恩就建議家長想入場為仔女打氣，不妨試吓輪流入場，自己仔女游嗰陣就入場，游完就畀張飛下一個家長。
男、女拔萃初賽領放
噚日一共產生七個學界紀錄，其中三個由男泳手打破，其中有兩個都係嚟自A組50米自由泳，包括藝人曾華倩囝囝林浩賢游出23秒50，但都慢同場九龍華仁書院嘅孫為倡嘅23秒47少少；而另一個男子組紀錄係B組嘅莫壠迪，佢喺200米蛙泳游出2分19秒10嘅時間。至於壓軸決賽，會喺下月七號同場舉行。