在指宿白水館一覺醒來，本應該吃過早餐後就坐旅遊火車返回鹿兒島市，再去機場等下午五時嘅香港航空班機返港，但早一日已預知歸期（10月21日）就是香港遇上強颱風之時，一定冇班機從香港起飛，打咗輸數。後來上網果然得知香港航空撤銷咗10月21日嘅航機。
點樣好？幸而當今科技發達，消息流通迅速，在10月20日離開城山酒店之前，已向Front Desk當值人員求助。由於日本僱員講英文係半桶水，我地唔識日語，雖然誠意十足，大家溝通得辛苦，努力上網尋找機票，還是要搞咗個幾鐘頭，先至訂到機票，先由鹿兒島空港（位於霧島）坐日航飛大阪伊丹空港（機場），在大阪住一晚，再在星期六（10月22日）早上乘全日空（ANA），自關西空港飛香港。價錢呢？當然係俾足full fare，零舍貴，但事急馬行田，照磅水可也，否則滯留在鹿兒島等香港航空，實不知如何是好。
城山酒店職員話一切辦妥，要左丁山簽信用咭找數，拿出AE國泰信用咭，賺番啲里程都得啩！點知職員話ANA唔收AE咭嘅，要收VISA咭，好彩隨身有幾張啫，商戶拒收AE咭，係經常有之事，左丁山見得多，出外旅行一定帶齊AE、VISA與Mastercard嘅。簽完就再冇細看職員打印出嚟嘅文字紀錄，匆匆就與親戚上租車直奔指宿，然後叫在港嘅肥仔K代訂大阪酒店住一晚，佢回覆話訂咗大阪梅田站嘅Hotel Ganvia，28700日圓一晚。
離開白水館之前，先問櫃台職員鹿兒島空港電話號碼，輸入GPS系統，以為一切順利，點知行呀，行呀，行咗成個幾鐘頭，根據指示一路就返到鹿兒島市區中心，好似離開機場仲係好遠噃，呢次唔信GPS導航系統嘞，一於信自己對眼與常識判斷，見到左轉往「中央噔」嘅路牌，立即左轉，，在火車站落車，攞行李跳上的士趕去機場。貌似七十幾歲嘅司機揸車快狠準，由小路衝出大路，過隧道即駛入南九州道（快速公路），飛馳三十幾分鐘後就到咗機場，如果坐租車自己駕駛，怕誤晒班都似，有時啲GPS系統太過正路，係冇當地的士司機咁熟路嘅。坐日本JAL內陸機到大阪，原來相當舒服，空姐指示乘客坐低後，自己都坐在前面，跟住起飛，一個小時就到，空姐郁都唔駛郁，日本乘客又乖，個個靜默冇服務要求，編在呢班航機嘅空姐，空閒到冇人有。到達伊丹空港，又係坐的士去梅田啦，的士司機又係老到七十幾八十模樣嘅，唔忍心叫佢搬行李，一於自己親自搬上車啦！