雙曼上周齊齊瀨嘢，兩位領隊摩連奴同哥迪奧拿更喺倒戈戰雙雙大敗，就好似由天堂跌落地獄，甚麼連勝光環都褪得七七八八。其實上周仲有花生味更濃嘅教練新聞，就係「銀狐」納比接任中國國家隊教練一職，年薪高達2,000萬歐元；以尼馬啱啱同巴塞隆拿續約都係1,600萬歐元年薪，已經屬巴塞第二高，教國家隊一年得嗰十幾二十場比賽，人工仲高過球員，真係「梳肝」。
當然啦，強國有的就是錢，就算世盃外出局在望都唔怕使大錢。喂，一個拎過世界盃、歐聯、意甲、亞冠盃等嘅教頭都肯接手，淨係名氣已經夠晒數啦。不過，國足理論上將目標放喺2022年世界盃，如果納比有幸做到嗰陣，兼帶到國足進軍卡塔爾，到時已經74歲，小弟真係好擔心佢老人家仲有冇咁嘅精力帶隊。
國足要名氣，其實世界潮流反而係少帥；英格蘭國家隊仲未落實新任領隊人選，般尼茅夫領隊賀維就成為候選人之一，就算呼聲唔算高，對帶領般茅成為英超黑馬嘅賀維都係一種肯定。睇賀維嘅履歷，只係踢過樸茨茅夫、般茅呢啲中小型球隊，領隊生涯都係拎過英冠冠軍咁大把，唔好話應徵做國足教練，佢封履歷信如果咁好彩去到蔡振華手中，都會一手被掟落垃圾桶。
般茅排緊英超第10，講唔出係特別好戰績，不過戰友咖喱稱呼佢做「英超哥迪奧拿」，除咗好後生已經做領隊，2008年開始帶般茅，當時不過31歲，佢堅持地面戰更算得上英格蘭非頂級球隊嘅清泉。小弟好欣賞般茅嘅「90後」部隊，好似哥林威爾遜、佐敦伊比、祖舒亞京治；當然有啲私心，希望賀維打番起韋舒亞啦。
文：牽牛