近年好多公司越來越注重年報，事關年報就好似面子咁，整得靚仔，披露嘅資訊夠齊仲有獎拎㖭。好似香港管理專業協會噚日搞嘅「最佳年報比賽」，中電（002）就連續兩年取得最佳年報大獎。
基本上，攞獎嘅班底變動唔大，工商企業類金獎繼續係港交所（388），大酒店（045）就升呢，同匯豐（005）一齊攞銀獎，銅獎就頒畀港鐵（066）、領展（823）同太古A（019）。
今年「評審特別獎」頒畀長和（001），究竟長和本年報有幾特別？協會代表冇詳細解釋，只係話「特別獎」係表揚對方某啲地方做得特別好喎。
連續兩屆攞獎嘅領展投資者開係及企業財務主管丘兆祺就話，每年都要花幾個月心血去搞年報，因為領展百分百公眾持股，要滿足唔同投資者嘅要求，加上公司好多活動，要歸納番又要創新好高難度。
唔講真係唔知，上市公司如此用心做年報，但華華始終懷疑有幾多散戶會用心翻閱年報囉。