除咗對六四嘅睇法，點睇《基本法》23條立法，都係特首候選人唔可以迴避嘅問題。梁振英5年前今日被問到23條立法問題，即時反應係避，避唔到就耍。唔信？睇吓當年CY點樣答。佢話喎，立法與否要睇政治條件，「包括當時大家對香港情況嘅睇法，同埋市民對立法內容嘅睇法」，就算「唔需要急於講吓屆做到定做唔到」，「但要知道憲制性責任係喺度！」
睇到啦，本質上都係支持23條立法。雖則梁振英任內呢幾個月，唔可以立到23條，但若然佢一旦連任呢……嘩，唔使問阿貴都有答案嘞啩，尤其家下嘅政治環境，講吓港獨都要劏要殺咁，學校唔畀講、大範圍唔畀講，而青政引發嘅宣誓風波更令阿爺對港獨問題「有殺錯、冇放過」，怕且23條喺梁振英下屆任期重來，都係預咗。