不知何故，左丁山搭單嘅寫字樓嘅門鎖壞咗，開唔到門，當事人為免拖延時間太耐，立即叫辦公室助理出街搵師傅嚟解鎖。專家即是專家，師傅三兩下手勢就搞掂，開門後順便修理好門鎖嘅小瑕疵，前後不夠半小時，收費五百元。計起嚟，時薪近一千，超出最低工資不知多少倍，伸算一個月嘅收入都幾好。左丁山就認為呢類收入不會出現在政府統計署嘅香港家庭入息中位數之中，是藏富於民嘅一個例子。
沙田陳太女兒家中冷氣機滴水，遭樓下投訴，於是搵相熟冷氣機師傅嚟修理，自己返工不在家就請陳太照應。陳太在樓下等師傅到，碰見股票H太太，H太話：「哎吔，我阿媽又係住喺呢一度嘅，我叫緊師傅嚟整冷氣機漏水。」兩人傾傾吓，師傅駕到，哎吔，好鬼巧合，原來陳太跟H太嘅空調修理專家同是一人，都係幫襯咗二十幾年嘅。師傅Y先到H家，再到陳家，一個鐘頭搞掂晒，原來冷氣漏水呢回事，日日都有，師傅雙手根本做唔切，但每次唔駛半小時就搞到妥當，師傅Y對陳太講：「我唔明點解冇乜年輕人入呢行，我專搞水電冷氣，真係生意接唔切，唯有應付咗你地呢啲老客仔先。」陳太問冷氣機為何經常滴水？傅師Y笑言：「益我吖嘛！其實香港啲舊樓半新樓嘅冷氣去水喉設計得細一啲，日久就塞住；新樓已經將去水喉加大，唔會塞㗎嘞，點知新款冷氣機就全部係配置細啲嘅去水管，變咗冷氣機自己有事，真係益晒我地呢行！」
為何新款冷氣機嘅去水管縮咗水？一位空調零售小老闆對左丁山講：「自中國工業興起後，所有電器都加唔到價，名牌冷氣機為咗維持競爭力，就盡量將配件成本壓低，樣樣減少少，於是連去水管都細埋囉！」唔怪得師傅Y話新冷氣機明益佢地，令佢長期生意不愁，佢識得安裝燈飾、修理水喉廁所、調校冷氣，根本上又係一個藏富於民嘅典型，搵錢一定多過畢業十年八年嘅大學生，呢類熟手技工在屋邨物業管理處屬於工程部。一位物業管理專家對左丁山講：「請你寫幾筆，物業管理係朝陽行業，報紙係夕陽行業。我呢行以後唔憂冇工做，香港公屋私樓年年增加，一定要人去管理維修，無論經濟衰或市面好景，你都要交物業管理費嘅啫，我呢行就坐定粒六，以後有升無跌。」咁巴閉，不如搵個記者同佢寫篇特稿介紹吓新人入行，點知專家話：「唔駛嘞，有一個訪問過我嘅記者話要轉行做物業管理呀！」