勞工顧問委員會明年屆換，勞工處公佈，今年有8名工會代表，競逐5個勞顧會勞方代表席位，候選名單熟口熟面，4名現任勞顧會代表都有參選，工聯會就由立法會選舉失利嘅鄧家彪代替吳秋北出戰，選舉下月12日舉行，由全港400幾個工會投票。
今年選舉，政府紀律部隊人員總工會主席劉玉輝都有報名，紀總同工聯會旗下政府人員協會關係密切，不時一齊出聲明表達意見，工聯會會唔會過票畀佢成為焦點。
劉玉輝同八方講，報名參選之前有同工聯會同勞聯打過招呼，反應正面，由於勞顧會內冇紀律部隊工會，佢希望日後可以紀律部隊工會身份為員工發聲。
不過，有勞工界就質疑，紀律部隊工會對本港嘅勞工政策同法例未必有好深認識，對佢參選有保留。