建制派捉住青年新政兩位立法會議員梁頌恆同游蕙禎嘅宣誓方式大做文章，做過多年議員嘅人民力量大嚿陳偉業都睇唔過眼，不惜翻自己舊賬，話自己喺2012年10月10日第5屆立法會宣誓時，適值辛亥革命101周年，當時佢就戴上中華民國國徽頸巾，再手握孫中山遺像宣誓，但當年立法會秘書處同立法會主席曾鈺成都冇宣佈佢宣誓無效，政府亦冇話要申請司法覆核。
大嚿話，今屆立法會宣誓有議員只係展示Hong Kong is not China字樣，秘書處就拒絕監誓，梁君彥又話宣誓無效，689更試圖透過司法覆核阻止議員再宣誓，反映過去4年，「港共日益囂張，行政立法獨立已蕩然無存」喎。