李嘉誠基金會聯同社聯及聖雅各福群會啟動嘅「善用自主 駛得啱 善用錢」計劃，噚日正式向參加計劃學校嘅應屆DSE考生派發5,000蚊現金券，冀助學生面對公開試關口。
獲親筆撰寫心意卡
元朗嘅東華三院盧幹庭紀念中學同天水圍嘅伯裘書院喺噚日獲發現金券，其中盧幹庭中學嘅鄧同學除咗5,000蚊現金券仲有額外收穫，就係李嘉誠親筆撰寫嘅心意卡（圖），係首階段計劃抽出嘅一千零一個。
誠哥留字「應試之年，一點鼓勵」，鄧同學收到梗係相當開心，表明會「堅持下去，找到自己目標」，而5,000蚊現金券會用嚟買試題練習等備戰。計劃𠵱家有51間元朗、天水圍同離島區嘅學校、逾5,700名考生參加，基金會話日後或擴至其他地區㗎。