前排特首梁振英接受訪問時，咪即席下廚包吓山東餃子嘅？查實呢，佢喺之前，好似2013年咁吖，都示範過呢個秘技，當時都仲有啲新鮮感嘅，正如5年前大家都對呢位山東漢子覺得好新鮮㗎！
而當年今日仲備選緊嘅梁振英，原來專登抽空返咗鄉下山東，接受山東大學頒授嘅名譽博士學位，當然唔只衣錦還鄉咁簡單。佢特別以一國兩制在港實踐為題做演講，強調社會應該了解《基本法》同國情，同時應該將香港嘅發展同內地更好地結合，等香港同國家共同發展，佢仲即場「表演」兩句威海話冧鄉里：「山東人不講山東話，將來回家怎麼辦」。
雖則CY嘅發言內容冇乜特別之處，但肯定好啱阿爺聽，官方《新華社》當時更為此刊登700字嘅報道，CY果然清楚阿爺要啲乜，4年嚟大家都睇得到。