自由黨最近改選領導人，原本冇人報名參選嘅主席，最後由飲食界張宇人Tommy去馬並當選。唔少政圈中人好奇怪，Tommy向來唔多專注黨務，何解突然咁上心？原來背後有段古，已經卸下議員身份嘅前黨𣁽方剛笑笑口話，係佢游說Tommy揸莊，兼且覺得自由黨唔使下下ABC（anyone but CY），甚至覺得若梁振英搵自由黨入行會，不妨考慮喎！
話入行會冇所謂
其實之前榮譽主席田北俊講過，若果黨內冇人選，主席一職可以懸空，但原來方剛覺得懸空掌舵人職位唔係太好，游說Tommy百忙中抽空接任下，笑稱用咗一堆「糖」冧掂對方。對於Tommy一接任就淡化ABC色彩，方剛亦力撐冇乜問題，覺得唔係下下都要針對個人，事實上Tommy選舉時真係冇打過反梁旗號喎！
外界有傳CY想喺連任前改組行會，仲有意邀請自由黨入閣，田少話明反對，方剛卻覺得未嘗不可，覺得溝通始終有好過冇；唔驚得嗰不足一年時間，CY借自由黨過橋攞分？方剛始終睇得開，唔覺得係大問題。人選方面，盛傳人選張宇人早前回應傳媒時講過，政府冇搵過佢；咁如果搵方剛呢？方剛冇閂大閘喎！由此可見Tommy主理下嘅自由黨，未來嘅ABC味會大減咯，唔知自由黨以往嘅忠實粉絲，會唔會心思思、念田少？
李八方
mailto:pf_lee@appledaily.com