工黨何秀蘭忽「髮」奇想，話大家關心青年新政游蕙禎「扑嘢」論，但其實游BB更大問題係把長髮，由佢要用大量食水洗頭引伸到環保問題，認真耐人尋味。游BB就喺facebook不點名還擊，自言長髮留咗好耐，點都會用到護髮素、洗髮水嘅，之後順水推舟，由分享環保潔膚心得講到香港生態環境，希望大家以後「派少啲微膠粒」！
ig美腿照吸6,000追隨者
游BB話之前有研究顯示，市面上好多洗面、洗髮沐浴產品以及聲稱能去除角質嘅磨砂膏都含不可分解嘅微膠粒，若流入大海會破壞海洋生態，所以不妨考慮近來本地時興嘅手工皂等有機產品，仲話「比起關心長短髮，我們更應關注香港的生態環境」。但網民似乎更關心佢啱啱開嘅Instagram（ig）玉照，隱約露出美腿，喺一夜間吸引近6,000人追蹤，可惜已經刪除咗張相。