咪睇劉皇發公子劉業強斯斯文文，鏡頭前唔算多嘢講，估唔到發仔係長氣袋，中學讀男拔萃時最鍾意運動，排球、踢波、長跑乜都啱，放學後至6點半以運動為樂，試過一跑跑足幾個鐘，由學校跑去清水灣井欄樹都冇有怕！
今年50歲嘅發仔有3個家姐同一個細佬，中學入咗男拔，成績中規中矩，以數學成績最好，「因為唔使讀」。中五後到英國讀寄宿學校，之後喺英國倫敦政治經濟學院（LSE）主修統計學，「爸爸都畀好大自由度，無話要揀邊啲科讀」。
街坊等埋發叔飲茶
由於爸爸早年政商兩忙，發仔細細個由嫲嫲湊大，雖然平日同爸爸見面時間唔算多，但一家人每逢周日幾乎風雨不改坐埋飲茶敍天倫，「飲茶時不停會有街坊嚟搵老竇講區內問題……啲街坊好醒，知道星期日可以喺邊度搵到發叔」。
發仔係馬會會員兼馬主，話係因為爺爺好愛跑馬仔，知道佢數學有天份，「畀啲數據我計吓啲馬嘅賠率」，所以佢自小亦愛睇賽馬。