【本報訊】明年開業的私家醫院港怡醫院，向公立醫院前線醫護人員挖角。食物及衞生局局長高永文昨承認，部份公院人手短缺，指局方已引入「醫護人員退休後重新聘用」機制，並改善培訓及晉升機會，以解決流失率較高的問題。立法會醫學界議員陳沛然認為不應與私院「鬥加人工」，希望局方解決人事管理問題，挽留人才。
高永文：適時增聘人手
高永文昨出席活動被問及港怡挖角潮，高表示新醫院投入服務要聘請人手，「佢都無可選擇地一定要喺現有機構聘請」，問題在於局方能否掌握員工流失速度，及其他醫院能否處理聘用或挽留人手問題。
高永文續指有信心銜接人手安排，又指醫管局與港怡有密切聯繫，能掌握招聘資料，如有需要會適時增聘公院醫護人手。
醫管局主席梁智仁則指，人手短缺只屬暫時性，「開新私院一定會請好多人，但大部份都係一次過嘅，唔會每年都請咁多，只係暫時請得多」，又指醫管局亦繼續請人，並透過改善晉升機會挽留人才，「短暫可能會（人手）縮短啲，但唔係一個大問題」。
立法會醫學界議員陳沛然指，挖角令公院有經驗員工流失，促醫管局以不同方法挽留人才，「唔係講（與私家醫院）鬥高人工，呢個係冇意思，有冇方法留員工喺自己個機構做，唔係只睇錢走，而係工作環境、晉升機會、工作量」。
陳沛然以醫管局員工第一年入職不獲加薪為例，「呢個（問題）我講咗10年，當年用唔同方法節約係理解，但到𠵱家係咪可以調整人事條例，令員工留低同有歸屬感？」陳直指人手短缺是對局方的提醒及教訓。
■記者葉偉東