甲組球會傑志在沙田石門區向政府租地盤建足球訓練中心，耗資八千幾萬，得馬會捐款六千三百萬，第一期工程已經完工，去年九月啟用，仲講緊與中大合作，加建多一層。呢個足球訓練中心幾受足球界及足球發燒友歡迎，因為香港難得有一個像樣嘅足球訓練場也。
點知政府突然話要收地興建公屋，不日收回傑志訓練場，標準馬迷左丁山嘅第一個反應就係戥馬會慈善基金肉痛，大佬呀，大拿拿六千三百萬元，玩一年就報銷？即使租約可以拖多三五七年，都係唔抵啫，六千三百幾萬捐畀醫院，可以買兩三部拯救病人嘅最新儀器呀，灣仔律敦治醫院嘅心臟科救急扶危，享譽香江，造福灣仔區至南區嘅居民，班心臟科專家固然醫術好，但主要係靠馬會捐咗二千萬得以購入最新手術設備咋。
相信傑志、馬會當初都誤以為石門幅地可以向政府續租再續租，先至投下巨資嚟興建足球訓練中心嘅啫，現在馬會筆捐款真係捐得冤枉，係繼捐出四億元翻新政府大球場之後嘅另一單丟錢落鹹水海，睇怕會打擊馬會以後捐錢俾香港體育界嘅興趣。
睇嚟呢一次又係梁振英指導思想──先易後難──嘅傑作，趕走傑志話咁容易，起公屋噃，大條道理，要向棕地埋手，與鄉紳業主周旋，又係幾難嘅，最近終審法院裁決希慎置業嘅私有產權應受基本法保障，打贏城規會之銅鑼灣區建築物高度限制令，便可推論如果棕地業主與政府打收地官司嘅話，政府好可能會輸，故此不如趕走政府土地上嘅橫洲村民更加容易。
中國有一個足球夢，內地官媒曾經講過，足球場係中國承擔不起的奢侈，但因為習近平發緊足球夢，於是各省市爭相推動足球運動，不敢盲搶地起樓，梁振英仲未識發一個足球夢，仍然係發緊起樓夢，大概佢要上京述職或請示可否連任時，由習近平提醒佢，咁就傑志足球訓練中心有救嘞。中國足球隊賽績乏善足陳，如果唔講政治正確，昔年國足等於中華民國足球隊，又等於香港足球明星隊（1950-1960年代中）嗰陣，由香港球星組成之中華民國球隊先至係最威，可橫掃亞洲，香港號稱亞洲足球王國！之後以中華人民共和國之大，人口13億人之多，國足無法子叻過香港球員，香港唔再出現足球明星，對整個中國都不利，復興香港足球，或者可為中華人民共和國爭光，達成習大大之足球夢㖭。下任特首不妨諗諗佢！