練馬師呂健威收咗蔣嘉琦做徒弟之後，兩師徒出名合拍成績好。不過勢估唔到跑到這天季內第八次賽事，呢個師徒組合至係今季首度攜手入凱旋門。
第二場四班草地1800米，大熱門落在呂、蔣合作馬「駕善」身上，此駒沿途前置跑主動，直路雖受杜利萊座騎蘇偉賢馬房「神威福將」強力挑戰，「駕善」看似會被追越，但嘉琦BB力撐狂策之下，最終以一條線位之微，頂住「神威福將」先過終點，單Win及組合獨贏A2分別派37及18元，呂健威苦戰一個月，亦告打開今季勝利之門。
「駕善」同時收復上賽9月11日1600米跑第二之失，亦幫剛周三（9月28日）至停賽復出的嘉琦BB重響勝鼓，是她季內第三Win，更為這天頭場黎海榮「駕迅」搏失跑第三的「駕」系馬陣營贏馬補數。
反觀陳慧琳老竇陳崇偉的團體馬「神威福將」閘前落飛着綠燈，跑落卻唔好彩，10日內一谷一田，連續兩場做阿二。今仗三、四名分別為「駟寶」及「勁豐裕」，四重彩派4,139元。