金融界好多人鍾意打golf，本港首隻「Golf股」本間高爾夫球（6858）招股上市，噚日舉行投資者推介會，公司為博芬佬、分析員好感，請來2016年里約奧運高球銅牌得主馮珊珊即場示範揮桿，教咗揮桿入洞，先再講入飛。
馮珊珊話，好欣賞董事長劉建國支持高球行業發展，特別係佢推動年輕人打高球，於是2013年開始就擔任品牌代言人。
公司設有高爾夫球測試中心，馮珊珊參加里約奧運，所用嘅球桿就係利用公司嘅測試中心，度身訂做。
可惜，香港暫時未有呢個測試中心，只得韓國、日本同上海分店先可以畀客人，利用佢嘅電腦去分析揮桿力度、速度等數據，再去揀最啱自己嘅球桿。
噚日投推現場，公司專登設置一個測試中心，畀一班芬佬、分析員大概了解吓，點用電腦分析最適合球員嘅球桿。