各位有票在手的市民，今屆立法會選舉，懇請你出來投票。
我不會用「神聖一票」來形容你手中的選票，就好像街市凡女人都叫「靚女」，凡港女都叫「BB」，講的人不信，聽的人不齒，俗套了。
有幾神聖？有人視選票是換購蛇齋餅糭的coupon；有人當是團購，甚麼社團、聯會、宗親組織，搞出「聯合推薦」投票名單，「消費者」一齊投，有着數。
某些黨派要向契仔契女「過票倒票」時，你便知道「選票」是「手信禮物」，送禮自用都咁適宜。
選票不一定神聖，但有票仍然要投。
有票不投，等於有食唔食，做浪費選票的大嘥鬼。
想像正收看電視的《尋走他鄉的選票》節目，King Sir用獨特聲線旁白：「喺北韓大陸呢啲選舉貧窮地方，好多人一生都未見過選票，佢哋只能住喺不見天日嘅豬欄，等待政府決定自己嘅命運。」然後便會有藝人出鏡感性的說：「見到佢哋嘅遭遇，我覺得香港人真係好幸福。我哋有得投票，仲成日嫌三嫌四唔想去投。對當地居民嚟講，開心真係好簡單，有得投票，已經好滿足。」
當你看到那些種票新聞，甚麼公屋住戶變IT人，弱能院舍也踴躍登記做了選民，你應該明白，有些人為了爭奪一張選票，不擇手段。等於市場為了一對波鞋又排隊又打尖又賣假貨，你便明白，你手中的選票，便是限量珍藏版，有價有市，你捨得隨手拋棄嗎？
你再回想，為了爭取選特首的那一票，香港人上過街聞過催淚彈捱過警棍，那一票仍然未到手，你便會明白，有得揀其實並非必然。前人替我們爭取到立法會有直選，我們手上有票了，有票，你真係唔要？
咪做選票大嘥鬼，惜投為香港﹗