講起金嗓子（6896）董事長江佩珍（珍姐），話佢係「喉片界火雞姐」，一定無人異議。舊年珍姐以霸氣姿態喺公司上市儀式敲鑼，成功受大家注目。
珍姐噚日主持業績會，劈頭就問：「上市一年，講句白話（廣東話）得唔得」，隨即廣東話與普通話並用，講解公司業務，畀大家睇佢日日學習嘅成果。
佢一講到新產品就好興奮，問佢預計新產品「植物飲料」未來佔整體業務幾大比重，珍姐即刻化身江大媽，形容喉片係「大兒子」、喉寶係「二兒子」、植物飲料係「老孻」，做幾大就順其自然咁話。
新產品有個特別地方，罐上面竟然冇珍姐嘜頭，珍姐解釋，今次係全新產品線，想同金嗓子喉糖分開。佢其實都好想落番自己嘜頭㗎，認為望落有保證、安全啲。珍姐仲話，飲料上面有QR code可以畀後生仔睇公司活動，「老孻」果然夠晒潮。