星期五在陸羽飲茶，埋單時分，見到前立法會主席曾鈺成推開房門走人，經過我哋張枱，有人嗌聲：「曾特首呀！」曾主席回眸一笑，不知是甚麼意思呢？餐廳R不知此人是誰？問聲：「Who is he？」左丁山話：「Jasper Tsang呀。」餐廳R回應：「佢係唔係真係會競選特首呀？贏得喎。」左丁山提醒佢：「一人一票選特首就會有機會，依家仍然係由選委會投票呀，出現曾特首嘅機會微啲咯。」
講起選舉，今個星期日就去投票選立法會議員，人人有兩票，餐廳R係飲食界選民，有公司票，加加埋埋有九票在手，梗係受候選人重視啦。飲食界有兩位候選人，就係張宇人及伍永德。自由黨張宇人做咗議員好耐，飲食界選民幾難未聽過佢嘅大名，至於獨立候選人伍永德，究竟係邊位？左丁山唔識，餐廳R開餐廳26年，亦唔識伍先生係何許人也，要立即上網搵吓佢嘅資料，原來係西營盤一個廚師，搵埋佢張相俾餐廳R望吓，佢話：「唔識，從未見過。」
張宇人識唔識呀？餐廳R：「每次選舉Tommy都上我公司搵我，好客氣，最近又上過嚟傾偈啦，我乘機向佢大吐苦水，請佢貼地了解餐廳經營之苦處，向政府機關，特別係食環署多多反映。」
選舉嘅一個好處就係當議員要競選連任嘅時候，特別體察選民情況，張宇人呢輪勤於拜訪選民拉票，一定聽咗唔少餐廳老闆嘅苦水。例如餐廳R有乜「訴苦水」呢？當然係被迫遷舖啦，將餐廳由商場搬去大道東，離開舊址大概一千米，係街舖，但原來原班人馬及原本餐廳搬到新地址，要另外領取酒牌，原來嘅酒牌立即無效。攞牌就要向酒牌局申請，餐廳R以為十拿九穩，點知酒牌局班尊貴委員成個8月放假（本來逢星期二開會），8月份一個會都冇開，餐廳R間新舖就要在8月尾開業，當然為之紮紮跳。有人教佢直接向警務處攞牌，食環署會OK嘅，畢竟係有歷史嘅餐廳吖嘛。警方好快就發咗酒牌，但有附帶條件，晚上十一時就要關窗關門，以確保酒客聲音不外洩擾民。開餐廳又唔係開酒吧，餐廳R當然立即應承，拿了批文就向食環署備案，點知食環署通知佢，晚上十一時關窗，係一項有條件的發牌，不是無條件，凡是有條件發牌，要再由酒牌局審核批准！香港啲官僚真識玩條文，餐廳R唯有向來訪嘅張宇人呼冤，當佢係飲食界冤情大使。