樂壇小強阮民安02年出道，到o依家已經出道14年由組合E-kids到o依家單飛，真係「威水史」不斷。
13年佢接受雜誌訪問，使出freestyle rap絕技「拍MV，拍MV，拍MV，拍MV，講完」真係震憾十三億人。嗰時佢仲要扮星爺《賭俠》入面嘅情節，話佢聽到菲律賓工人講G-Dragon，又叫自己香港Tommy。佢Rap起上嚟每一下斷句字字鏗鏘，你話佢甩beat咩？係你唔識欣賞咋！唔通佢識如來神掌又話你知咩！
叫得「樂壇小強」就緊係要有一首自傳式歌曲啦！一曲《踩唔死我》MV土炮照抄G-Dragon嘅《Crayon》，啲歌詞夾硬嚟咁講自己嘅黑歷史，呢啲咪叫豁達囉，連GD本尊都要搵佢合照，當今香港樂壇王者捨你其誰呀Tommy仔！
Tommy仔之前爛賭爭落周身債，06年佢喺澳門賭錢借貴利24萬，搞到俾大漢挾返香港，佢仲話當時嗰兩個大漢跟到佢去電台o添。11年傳出佢俾財務公司狂追數，但事後否認咗；到12年又曾經有人爆料指佢爭落三千五百蚊冇還，當事人仲攞埋借據，連Tommy身份證都有埋。