世人也預計到電動車是未來汽車業的主軸之一，不過就估唔到咁快殺到落富豪級車系MAYBACH之上。廠方日前發放了一輯名為「Vision MERCEDES-MAYBACH 6」概念車的相片，此車將定位為2+2雙門豪華跑車，超級流線、車長接近六米的車身已經相當吸睛，睇埋發晒光的弧形中控台，未來感爆燈。設計師驚死佢唔夠招搖，仲要整對鷗翼門俾佢，點出街呀！不過此車的焦點卻是純電EV模式行駛，搭載四部PMSM永磁同步馬達，最大馬力輸出可達750匹，0至100km/h加速僅需4秒以下。所配備的輕量化80kWh電池，每次充電後可行駛超過500km。時間就是金錢，充電所需時間亦是關鍵，據說高速充電的話，每五分鐘的充電量足以行走多100km，有冇咁勁呀！看來Rolls-Royce及Bentley又是時候急起直追。
記者：許維雅