財政司司長曾俊華每周一blog，幾成慣例，市民似乎對佢呢種單向式hardsell都幾受落。噚日鬍鬚曾又喺網誌同大家訴心事，透過憶述跑步往事，大讚體育好重要，似乎要強攻到曾被梁振英形容為無經濟貢獻嘅體育人歡心。
鬍鬚曾噚日一朝早已經主持全城街馬主辦嘅「香港街馬＠中環2016」起步禮，冒雨擔遮都要出席，明顯係瞓身支持，佢之後喺網誌大讚活動有意義，將跑者帶到香港唔同角落，為社區帶來正能量。同時憶述那些年跑步往事，指大學時開始跑步，當年住喺麻省理工學生宿舍，每日清晨都沿住靠近波士頓嘅查爾斯河跑6英里（約10公里），「炎夏寒冬，風雨不改，遇上嚴寒天氣，頭髮甚至會結霜」，每次跑完步就沖涼後食早餐；下午做劍擊或負重訓練時，更加得心應手。
佢自爆曾經因為跑步受傷，但冇因此改變跑步習慣，至今每日起床後第一件事都係到踏步機運動30分鐘，一邊晨操一邊睇新聞，指身體受運動產生嘅安多酚影響，可以帶住愉快心情展開一天工作。
梁晒政績反擊
跑步之外，鬍鬚曾亦係劍擊愛好者，佢貼埋相話早前本地一班資深劍手組隊代表香港到澳洲參加劍擊「元老賽」，當中就包括佢早年教授嘅學生，認真威水。佢強調體育比賽能夠發揮團結社會功效，喺呢排舉行嘅奧運會更加表露無遺，自稱係運動得益者，希望更多青年朋友能夠透過運動，搵到正向人生。
嘩，鬍鬚曾對體育運動，評價好高喎，相反佢嘅潛在特首對手梁振英，就話過體育係零經濟貢獻喎，係咪針對梁振英嘅弱點出擊呢？
面對來勢洶洶嘅鬍鬚曾，梁振英都有喺網誌出招大晒「政績」，例如過去4年政府用喺社福嘅財政開支增加55%，話「我敢於在扶貧安老問題上大動作，是因為我對香港有信心」。佢又引用上月因為失業而領取綜援個案宗數跌至1997年以來新低，自誇「我」好有作為咁囉。
李八方
mailto:pf_lee@appledaily.com