譚詠麟（阿倫）前晚喺澳門舉行「譚詠麟40週年巡迴演唱會－澳門站」，顧芮寧做表演嘉賓。阿倫喺半個月前踢波整親膝頭舊患，要包紮上陣。
聽日66歲生日嘅阿倫，早喺80年代同堪稱勁敵嘅張國榮（哥哥）競爭激烈，但前晚阿倫獻唱哥哥嘅《風繼續吹》，佢話：「我諗大家都會留意到娛樂圈係一個是非不斷地方，我作為一分子，好多藝人歌手都係尊重大家，佢哋都付出心血努力去做，包括以下呢首歌嘅歌手，佢嘅歌我好欣賞。」阿倫喺完騷後接受訪問，講到對哥哥嘅讚揚，佢話：「我一向都係咁講，當年大家嘅fans爭拗，只係fans年紀細，唔識分辨是非。」
囝囝打暑期工
至於膝頭傷勢，阿倫話當日想頂頭槌入波，但收唔切制撞埋龍門柱。而演唱會又一早排好舞，所以受傷都要做落去，佢笑話：「近排不停慶祝生日，以前可以邊食，仲跑步減肥，腳傷只可以做機收身。」囝囝曉風會唔會返港慶祝？佢話：「唔會，佢打緊暑期工創業。」係咪準備咗創業基金畀曉風？佢笑話：「做乜講你知。」
撰文：馮仁昭