呢個世界，唔止奧運會係4年一度，就連廣告都可以係4年一度，講緊嘅係美聯（1200）前高層黃錦康，佢喺上屆倫敦奧運會期間，推出「應肚即飛」廣告，推廣太極，到今屆奧運，佢就拍咗個能量鞋墊廣告，叫人「腳踏實地」。
大家呢排睇開奧運電視節目，不難發現有個黃師傅廣告，入面着住黃色唐裝上衫嘅仁兄，就係美聯前高層，廣告結合鞋墊與太極概念，仲教人「致勝心法」就係「腳踏實地」，夠晒crossover。
不過，黃錦康最令人印象深刻嘅廣告，始終都係「應肚即飛」，倫敦奧運期間播得十分頻密，好有洗腦效果，可惜《蘋果》之後搵佢示範就做唔番廣告效果囉。