鍵盤戰線噚日公佈網絡自由政策統計調查，佢哋喺6月起向32個政黨或團體發邀請書，希望政綱加入網絡自由嘅政策，結果只有泛民同本土等9個組織力撐鍵戰倡議嘅《網絡自由宣言》，建制、保皇同鄉事派幾乎全部冇回應。
鍵戰倡議嘅《宣言》，涵蓋三大範疇同九項原則，主要涉及網絡自由、網絡新聞自由、開放數碼經濟等。鍵戰發言人、有「滑鼠娘娘」之稱嘅鄺頌晴話呀，估計全港過半市民識上網，如果政黨唔關心網絡政策，市民應該睇清楚某啲政黨或候選人，可唔可以為市民爭取更安全同開放嘅網絡。
原來建制派中只有自由黨認同網絡自由相當重要。咁如果有政黨或候選人，選前為爭取選票承諾支持《宣言》、當選後違背承諾，點算好？滑鼠娘娘話相信選民唔會放過佢。