真係慘慘豬嘞！南韓體操精靈孫延上周六出戰韻律操個人全能決賽，雖然喺圈操、球操、棒操同埋絲帶操都有唔錯演出，但仍然唔足以令佢攞到奧運獎牌，最終以72.898分排喺俄羅斯嘅瑪蒙、古耶絲娃同烏克蘭選手列莎甸諾娃之後，得梗頸四，所以賽後佢都爆喊，真係戥佢可憐。
雖然佢三甲不入，但係佢喺四年前倫敦奧運得到個人全能第五名，今屆里奧就攞咗第四名，總算有突破。四年後嘅東京奧運，佢到時就係26歲，如果有份參賽，希望佢可以攞到獎牌啦。
至於韻律操強國俄羅斯就包辦連贏位，瑪蒙同古耶絲娃分別攞到金牌同銀牌，呢個賽果其實有少少爆冷，皆因古絲耶娃挾連續三屆世錦賽冠軍出戰里奧，但上周六嘅發揮冇隊友瑪蒙咁好，只係攞到75.608分，將個金牌輸咗畀攞到76.483分嘅瑪蒙。瑪蒙之前喺世錦賽未贏過金牌，家陣畀佢做咗奧運冠軍，算係吐氣揚眉。