網上嘅伏何其多，明明睇條題會覺得係入去睇靚女，點知入面去係個阿叔，都咪話唔嬲，所以喺度就同大家重溫下幾個出名嘅大伏，唔好再犯重複嘅錯。
「2R出浴照」，當大家滿心歡喜想睇黃婉君（Rosanne）及黃婉佩（Race）之際，入到去你只會見到係巴西2R李華度同朗拿度浸浴。
「阿雪系列」唔好見到阿雪，就以為睇到孫慧雪或者朱千雪，入到去你只會見到到「肉彈」林雪，不過有網民指到林雪都幾開心。
「李彩華著白色小背心」，喺2005年真係諗到都吸引，可惜入到去見到嘅唔係靚女李彩華，而係當年嘅香港仔漁業海鮮商會副主席李彩華，但佢真係着住白色背心做訪問。
「沈大師」如果你睇開娛樂新聞，見到「沈大師」應該會諗起沈卓盈（Jess），但如果你睇開財經新聞，見到「沈大師」應該會諗起著名財金評論家沈振盈，兩個都係大師，如果有一日睇到條題係「沈大師性感小背心」，你會唔會入去睇？
「馬賽對波圖」，一聽就知係法國足球隊馬賽對葡萄牙足球隊波圖嘅相啦，點會係諗到女藝人馬賽呢？都唔明點解大家會中伏(誤)！