「樂壇小強」阮民安（Tommy）前晚接受《蘋果》電話訪問，宣佈E-kids真係重組嘅消息，不過，佢喺訪問裏面提到：「我哋都知o依家啲歌手好勁㗎嘛，幾首歌就開紅館㗎嘛！」、「冇乜所謂啦呢個年代，扮棋都上到紅館！」似乎暗寸啱啱開完紅館處男騷嘅「坤哥」吳業坤噃！
坤哥昨日接受傳媒訪問，被問到有冇聽過E-kids嘅歌？坤哥話：「我有聽過E-kids啲歌呀，係一個好好回憶。」對於Tommy疑似講嘢有骨暗寸坤哥，身為後輩嘅坤哥就大方話：「Tommy冇暗寸我嘅，見到佢嘅facebook喺我攞獎時，佢都有讚賞我啦！我覺得佢講呢番說話，第一，佢冇指名道姓，第二，我覺得佢係講緊喺呢個年代，只要肯去做肯去努力，肯朝住一個方向繼續堅持，就可以做到自己嘅夢想，我諗佢係表達呢樣嘢，激勵身邊嘅人啫。」